Qashqadaryoda 2 hokim yordamchisi DXX tomonidan qo‘lga olindi

Yakkabog‘ tumanidagi mahallalardan birida hokim yordamchisi lavozimida ishlovchi shaxs o‘zi norasmiy rahbarlik qiluvchi 2 ta MChJga bankdan 1,7 mlrd so‘mlik imtiyozli kredit mablag‘i ajratilishiga erishadi.

Davlat xavfsizlik xizmatining Qashqadaryo viloyati bo‘yicha boshqarmasi xodimlari tomonidan iqtisodiy jinoyatlarga qarshi kurashish yo‘nalishida olib borilgan tezkor-qidiruv tadbirlari natijasida hokim yordamchisi qurilish materiallari sotib olish uchun ajratilgan pulni boshqalar bilan jinoiy til biriktirgan holda talon-toroj qilgani aniqlangan.

“Hozirda mazkur hokim yordamchisi va boshqalarga nisbatan Jinoyat kodeksining 167-moddasi (O‘zlashtirish yoki rastrata yo‘li bilan talon-toroj qilish) va 228-moddasi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan”, deyiladi DXX Telegram-kanalida tarqatilgan xabarda.

Boshqa bir holatda esa Shahrisabz tumanidagi mahallalardan birida hokim yordamchisi lavozimida ishlovchi shaxs shu yerda yashovchi fuqaro foydalanib kelayotgan, auksion savdolariga chiqib ketgan 5 gektar yer maydonining 50 sotixini qoldirib berish evaziga 500 dollar olgan vaqtida DXX va Bosh prokuratura huzuridagi Iqtisodiy jinoyatlarga qarshi kurashish departamenti xodimlari tomonidan ushlangan.

Qayd etilishicha, mazkur holat yuzasidan hokim yordamchisiga nisbatan Jinoyat kodeksining 168-moddasi (Firibgarlik) va 28-modda orqali 211-moddasi (Pora berish) bilan jinoyat ishi qo‘zg‘atilgan.

Avvalroq Qashqadaryoda 162 million so‘mni talon-toroj qilib, 114 millionlik soliqlarni to‘lashdan bo‘yin tovlagan, davlat dasturlari asosida fuqarolarga ajratilgan kredit mablag‘larini o‘zlashtirgan, Yunusobodda 35 ming dollar, Toshkent tumanida 30 ming dollar, Jizzax Jizzaxda 2000 dollar, Chustda 1500 dollar va 5,6 mln so‘m, Jarqurg‘onda 5,5 mln so‘m, G‘uzorda 300 dollar pora olgan hokim yordamchilari qo‘lga tushgandi.