Президент энергетика соҳасидаги муаммоларни кескин танқид қилиб, тармоқни ислоҳ қилиш бўйича муҳим топшириқлар берди. Шунингдек, соҳада кадрлар ўзгариши рўй бериб, янги энергетика вазири тайинланди. Бундан ташқари, миграция қонунчилигидаги ўзгаришлар, хорижга ишга жўнатиш билан боғлиқ фирибгарликлар ва куннинг бошқа маҳаллий хабарлари билан таништирамиз.
Президент энергетика тизимидаги бошқарувни кескин танқид қилди
Президент Шавкат Мирзиёев раислигида ёқилғи-энергетика тармоғининг устувор вазифаларига бағишланган видеоселектор йиғилиши ўтказилди. Унда соҳадаги бошқарув тизими кескин танқид қилиниб, масъул раҳбарлар фаолиятига баҳо берилди. Йиғилиш якунларига кўра, бир қатор кадрлар бўйича қарорлар қабул қилинди.
Президент энергетика соҳасида муаммо маблағда эмас, балки бошқарувда эканини таъкидлади. Қайд этилишича, сўнгги ўн йилда тармоққа 23 миллиард доллар хорижий инвестиция жалб қилиниб, 9,5 гигаватт қувватга эга янги электр станциялари ишга туширилган. Электр ва газ тармоқларини модернизация қилиш учун эса 30 триллион сўм йўналтирилган.
Шунга қарамай, Президент аҳоли ва тадбиркорлар энергетика тизими раҳбарлари фаолиятидан мутлақо норози эканини билдирди. Фақат июн-июл ойларининг ўзида қарийб 4 мингта авария содир бўлиб, айрим ҳудудларда электр таъминоти 8-10 соатгача узилгани танқид қилинди.
Йиғилишда кадрлар бўйича ҳам қарорлар қабул қилинди. «Ҳудудий электр тармоқлари» акциядорлик жамияти бошқаруви раиси Асроржон Аскаров лавозимидан озод этилди. Шунингдек, «Миллий электр тармоқлари», «Иссиқлик электр станциялари», «Трансгаз» ва «Ҳудудгаз» раҳбарларига йил якунигача синов муддати белгиланиб, натижа бўлмаса, улар ҳам лавозимидан озод этилиши ҳақида огоҳлантирилди.
Жўрабек Мирзамаҳмудов ишдан кетди, янги вазир тайинланди
Президент қарори билан Жўрабек Мирзамаҳмудов энергетика вазири лавозимидан озод этилди. Унинг ўрнига Шерзод Хўжаев тайинланди. Бундан аввал унинг номзоди Олий Мажлис Қонунчилик палатаси депутатлари томонидан маъқулланган эди.
Шерзод Хўжаев тайинловга қадар Энергетика бозорини ривожлантириш ва тартибга солиш агентлиги директори лавозимида ишлаб келган. У энергетика соҳасида 1998 йилдан буён фаолият юритиб келади ва 2019-2023 йилларда вазир ўринбосари бўлган.
Энергетика тизимидаги кадрлар ўзгариши бу билан чекланмади. Президент қарори билан «Ўзэнергоинспекция» раҳбари ҳам алмашди. Инспекцияга Аҳадхон Исоқжонов раҳбар этиб тайинланди, Дадажон Исақулов эса бошқа ишга ўтиши муносабати билан лавозимидан озод этилди.
Хорижликларни рўйхатга олмаганларга жавобгарлик кучайтирилиши мумкин
Энди қонунчиликдаги янгиликларга ўтамиз. Қонунчилик палатаси депутатлари миграция соҳасидаги қонунчиликни такомиллаштиришга қаратилган қонун лойиҳасини биринчи ўқишда қабул қилди. Унда чет эл фуқаролари ва фуқаролиги бўлмаган шахсларни турган жойи бўйича рўйхатдан ўтказиш тартибини такомиллаштириш ҳамда бу талабларни бузган ташкилотлар жавобгарлигини кучайтириш таклиф этилмоқда.
Лойиҳага кўра, меҳмонхона, санаторий, клиника ва бошқа қабул қилувчи ташкилотлар хорижликлар ҳақидаги маълумотларни E-mehmon ахборот тизимига ўз вақтида киритмаган тақдирда, уларга нисбатан жавобгарлик чоралари кучайтирилади.
Шунингдек, қонун лойиҳаси фуқароларни рўйхатдан ўтказишга оид атама ва ҳуқуқий механизмларни амалдаги қонунчилик билан мувофиқлаштиришни ҳам назарда тутади. Муҳокама якунида ҳужжат депутатлар томонидан биринчи ўқишда қабул қилинди.
Беларусда иш ваъдаси билан алданган ўзбекистонлик ватанга қайтарилди
Энди хорижда меҳнат қилаётган ўзбекистонликлар билан боғлиқ хабарларга ўтамиз. Беларусга ишлаш учун борган Ўзбекистон фуқароси иш берувчи ваъдаси бажарилмай, маблағсиз ва оғир аҳволда қолди. Минск шаҳрига етиб боргач, уни ишга таклиф қилган шахс алоқага чиқмай қўйган.
Фуқаро ёрдам сўраб Ўзбекистоннинг Беларусдаги элчихонасига мурожаат қилган. Дипломатлар ва Миграция агентлиги ҳамкорлигида унга авиачипта расмийлаштирилиб, Миграция жамғармаси маблағлари ҳисобидан ватанга қайтарилган.
Фуқаро 24 июль куни Belavia авиакомпаниясининг Минск–Тошкент рейси орқали Ўзбекистонга олиб келинди.
Канададан Германиягача: иш ваъдаси билан фирибгарликлар фош этилди
Бош прокуратура ҳузуридаги департамент томонидан ўтказилган тезкор тадбирларда Канада, Япония, Словакия ва Германияга ишга жўнатиш ёки виза расмийлаштириб беришни ваъда қилган бир нечта шахс аниқланди.
Жумладан, Бухорода тўрт нафар фуқарони Канадага ишга юбориш учун 5 минг доллар талаб қилган шахс 3 минг доллар олган вақтида фош этилди. Тошкентда эса Япония визасини расмийлаштириш баҳонасида 1 минг доллар олган шахс ушланди. Наманганда Словакияга ишга юборишни ваъда қилган мансабдор шахсдан олинган пул қайтарилди.
Шунингдек, пойтахтнинг Учтепа туманида Германияга ишга жўнатишни ваъда қилиб 8 миллион сўм олган масъул шахслар ҳам жавобгарликка тортилмоқда. Барча ҳолатлар юзасидан жиноят ишлари қўзғатилиб, тергов ҳаракатлари олиб борилмоқда.
Сурхондарё ва Жиззахда қарийб 9 килограмм гиёҳвандлик воситаси мусодара қилинди
Давлат хавфсизлик хизмати ва ички ишлар органлари ҳамкорлигида ўтказилган тезкор тадбирларда Сурхондарё ва Жиззах вилоятларида қарийб 9 килограмм гиёҳвандлик воситаси ноқонуний муомаладан олинди.
Сурхондарёнинг Термиз туманида дала майдонидан 4 килограмм гашиш топилган бўлса, Жиззах шаҳрида тўхтатилган фуқаронинг хўжалик қопидан 4 килограмм 840 грамм каннабис аниқланиб, ашёвий далил сифатида мусодара қилинди.
Ҳар икки ҳолат юзасидан жиноят ишлари қўзғатилган.
