Сув тежовчи боғлар учун қудуқ суви солиғи 1 сўм бўлади, Марказий банк омонатларга солиқ бўйича расмий таклиф йўқлигини билдирди, Тошкентда эса 80 мингга яқин чиптасиз йўловчи жаримага тортилди. Шу ва бошқа муҳим маҳаллий янгиликлар билан Kun.uz дайжестида таништирамиз.

Марказий банк омонатларга солиқ масаласига аниқлик киритди

Марказий банк банк омонатларидан олинадиган фоиз даромадларига солиқ жорий этилиши ҳақида тарқалаётган хабарларга муносабат билдириб, бу масала юзасидан ҳеч қандай расмий таклиф киритилмаганини маълум қилди.

Қайд этилишича, омонат фоизларини солиққа тортиш ҳақидаги фикр Фискал таҳлиллар институти томонидан илмий-таҳлилий тадқиқот доирасида билдирилган бўлиб, у давлатнинг расмий ташаббуси ҳисобланмайди.

Марказий банк иқтисодий ва молиявий соҳадаги ҳар қандай таклиф унинг банк тизими ва мамлакат молиявий барқарорлигига таъсири ҳар томонлама баҳолангандан кейингина кўриб чиқилишини таъкидлади.

Бюджетдаги асоссиз харажатлар қисқартирилади

Энди эса давлат маблағларини бошқаришга оид яна бир янгилик ҳақида. Ўзбекистонда давлат бюджетини тузиш ва ижро этиш тартибига киритилган янги ўзгаришларга мувофиқ, бюджет сўровларидаги асоссиз ёки самарадорлиги паст харажатлар қисқартирилади.

Янги тартибга кўра, шундай харажатлар аниқланган тақдирда, бу ҳақда билдиришнома олган ташкилотлар уч иш куни ичида янгиланган бюджет сўровини тақдим этиши шарт бўлади.

Шунингдек, маҳаллий кенгашларнинг бюджетни режалаштиришдаги роли кенгайтирилди, бюджет маблағларини тақсимловчилар эса камида уч йиллик ривожлантириш дастурларини аниқ натижа кўрсаткичлари билан ишлаб чиқиши белгиланди.

Наманганда яширин дори омбори аниқланди

Наманган шаҳрида ўтказилган тезкор тадбирда яширин омборхонадан қарийб 29 минг дона хорижда ишлаб чиқарилган дори воситалари аниқланиб, мусодара қилинди.

Дастлабки маълумотларга кўра, тегишли сифат сертификатига эга бўлмаган ушбу дорилар мамлакатга ноқонуний олиб кирилган бўлиб, уларнинг умумий қиймати тахминан 1,4 миллиард сўмни ташкил этади.

Ҳозирда дори воситалари бўйича экспертиза тайинланган. Ҳолат юзасидан суриштирув ишлари давом этмоқда.

Миллий сертификат тизимига яна 11 та чет тили қўшилади

Энди эса таълим тизимидаги янгиликка ўтамиз. Ўзбекистонда 1 сентябрдан бошлаб яна 11 та чет тили бўйича миллий сертификат олиш имконияти яратилади.

Янги тизим хитой, корейс, япон, испан, италян, форс, дари, пушту, урду, ҳиндий ва уйғур тиллари бўйича кўп даражали миллий сертификат тестларини қамраб олади.

Шунингдек, 2026-2027 ўқув йилидан ҳуқуқшунослик фанини билиш даражасини баҳолаш ва миллий сертификат бериш тизими ҳам йўлга қўйилади. Имтиҳонлар ўтказиладиган сана ва жойлар олдиндан эълон қилиб борилади.

Фермерлар дизел учун субсидияни автоматик тартибда олади

Қишлоқ хўжалиги соҳасида ҳам янги тартиблар жорий этилмоқда. Пахта ва буғдой етиштирувчи фермерларга биржа савдолари орқали харид қилинган дизел ёнилғиси қийматининг бир қисмини қоплаш учун субсидия энди автоматик тартибда ажратилади. Бунинг учун алоҳида ариза топшириш талаб этилмайди.

Янги тартибга кўра, 2026 йил 1 апрелдан 1 июлгача биржа орқали сотиб олинган дизел ёнилғисининг 1 тоннаси нархи 13 млн сўмдан ошса, ошган сумманинг 2 млн сўмгача бўлган қисми давлат томонидан қоплаб берилади. Субсидия миқдори Агропортал маълумотлари асосида автоматик ҳисобланади.

Маблағлар фермернинг махсус ҳисобварағига уч иш куни ичида ўтказилади. Техник носозлик ёки маълумот алмашинувидаги узилишлар юз берган тақдирда, фермер ёзма равишда ёки Агропортал орқали мурожаат қилиши мумкин.

Сув тежовчи боғлар учун қудуқ суви солиғи 1 сўм бўлади

1 августдан бошлаб замонавий сув тежовчи технологиялар жорий қилинган саноатлашган боғларда қудуқ сувидан фойдаланганлик учун солиқ ставкаси беш йил муддатга 1 сўм этиб белгиланади.

Янги тартибга кўра, имтиёз сув тежовчи технологиялар қўлланаётган боғларда бурғиланган қудуқлардан олинган сув ресурсларига нисбатан татбиқ этилади.

Мазкур чора сув ресурсларидан оқилона фойдаланишни рағбатлантириш, сув тежовчи технологияларни кенг жорий этиш ва қишлоқ хўжалигида сув сарфини камайтиришга қаратилган.

Тошкентда 80 мингга яқин чиптасиз йўловчи жаримага тортилди

Тошкент шаҳрида йил бошидан буён автобусларда чиптасиз юрган 79 минг 618 нафар йўловчи маъмурий жавобгарликка тортилди.

Ҳар бир ҳуқуқбузарга базавий ҳисоблаш миқдорининг ўндан бир қисми, яъни 41 минг 200 сўм миқдорида жарима қўлланган. Жорий йилнинг ўтган даврида ундирилган жарималарнинг умумий суммаси қарийб 2 миллиард сўмни ташкил этган.

Вазирликка кўра, автобусларда тўлов интизомини кучайтириш мақсадида йўл ҳақи тушуми пасайган йўналишларда мунтазам назорат рейдлари ўтказилмоқда.