Ўзбекистонда ярим йилда 192 трлн сўмлик қурилиш ишлари бажарилди. 42,5 млрд сўмлик солиқдан қочиш ҳолати фош этилди, Тошкентдан Манчестерга тўғридан тўғри рейс очилиши мумкин. Шунингдек, ҳайвонларни мажбурий рўйхатдан ўтказиш бошланди, Урганчда эса BYD ҳайдовчиси учта автомобилни қасддан пачақлади. Куннинг шу ва бошқа муҳим хабарлари — маҳаллий дайжестда.
Ўзбекистонда ярим йилда 192 трлн сўмлик қурилиш ишлари бажарилди
Ўзбекистонда 2026 йилнинг биринчи ярмида 192 триллион сўмлик қурилиш ишлари бажарилди.
Миллий статистика қўмитаси маълумотига кўра, ҳудудлар орасида Тошкент шаҳри 61,2 триллион сўмлик кўрсаткич билан биринчи ўринни эгаллади.
Кейинги ўринларда Тошкент, Фарғона ва Бухоро вилоятлари қайд этилган. Самарқанд вилоятида эса январ–июн ойларида 9,9 триллион сўмлик қурилиш ишлари амалга оширилган.
42,5 млрд сўмлик солиқдан қочиш ҳолати фош этилди
Энди бюджет ва солиқлар билан боғлиқ йирик ҳолатга ўтамиз. Бош прокуратура ҳузуридаги департамент ва Солиқ қўмитаси ўтказган текширувда 42,5 миллиард сўмлик солиқни қасддан тўламаслик ҳолати аниқланди.
Тергов маълумотларига кўра, 6 та корхона масъуллари 32,6 миллиард сўмлик қўшилган қиймат солиғини бюджетдан ноқонуний қайтариб олган, шунингдек, қарийб 196 миллиард сўмлик маҳсулотларни нақд пулга сотиб, тушумларни банкка топширмаган.
Текширувда Тошкент вилояти солиқ бошқармасининг айрим масъуллари ҳам аудит вақтида 5,2 миллиард сўмлик солиқни ҳисобламасдан ҳужжатларни расмийлаштиргани аниқланган. Ҳолатлар юзасидан жиноят иши қўзғатилиб, тергов ҳаракатлари давом этмоқда.
Тошкентдан Манчестерга тўғридан тўғри рейс очилиши мумкин
Халқаро қатновлар бўйича эса янги йўналиш очилиши мумкин. Ўзбекистон ва Буюк Британия Тошкентдан Манчестерга тўғридан тўғри авиақатновларни йўлга қўйиш имкониятини муҳокама қилмоқда.
Масала Ўзбекистон элчиси ва Manchester Airports Group раҳбарияти ўртасидаги учрашувда кўриб чиқилди. Томонлар янги йўналиш икки давлат ўртасидаги бизнес ва туризм алоқаларини ривожлантириш ҳамда Ўзбекистоннинг Европа билан авиабоғлиқлигини кенгайтиришга хизмат қилишини қайд этган.
Учрашув якунида рейсларни йўлга қўйиш билан боғлиқ ташкилий масалалар бўйича ҳамкорликни давом эттиришга келишиб олинди.
Ўзбекистонда ҳайвонларни мажбурий рўйхатдан ўтказиш бошланди
7 августдан Ўзбекистонда фуқаролар ва ташкилотлар сақлайдиган ёки кўпайтирадиган ҳайвонларни мажбурий идентификация қилиш ва давлат рўйхатидан ўтказиш тартиби кучга кирди.
Янги қонунга кўра, қорамол, қўй, эчки ва туялар туғилганидан 14 кун, чўчқалар бир ой, ит ва мушуклар уч ой, отлар эса тўрт ой ўтгач идентификация қилиниши керак. Белгиланган муддат тугагач, ҳайвон бир ойдан кечиктирмай давлат рўйхатидан ўтказилади.
Хориждан сақлаш ёки кўпайтириш учун олиб кирилган ҳайвонлар эса 21 кун ичида идентификация қилиниши шарт. Ҳайвон сўйилса, нобуд бўлса ёки четга олиб чиқилса, етти кун ичида давлат ҳисобидан чиқарилади.
Урганчда BYD ҳайдовчиси учта автомобилни қасддан пачақлади
Урганч шаҳрида ўзаро келишмовчилик ортидан BYD Chazor ҳайдовчиси учта автомобилни қасддан ургани акс этган видео тарқалди.
Хоразм вилояти ИИБ маълумотига кўра, 4 август куни икки фуқаро ўртасида келишмовчилик келиб чиққан. Шундан сўнг улардан бири BYD Chazor автомобилида Cobalt, яна бир BYD Chazor ва Damas’га қасддан шикаст етказган.
Ҳодисада одамлар жабрланмаган. Ички ишлар ходимлари ҳайдовчининг ҳаракатларини тўхтатган, ҳозирда ҳолат юзасидан терговга қадар текширув олиб борилмоқда.
Ўзбекистонда илк бор аэрологик шар учирилди
Энди илм-фан ва об-ҳаво кузатувларига оид қизиқ янгилик. Бухоро вилоятида Ўзбекистон мустақиллиги йилларида илк бор аэрологик шар синов тариқасида муваффақиятли учирилди.
Шарга ўрнатилган метеозонд турли баландликларда ҳаво ҳарорати, намлик, атмосфера босими, шамол тезлиги ва йўналишини ўлчаб, маълумотларни ердаги станцияга узатади.
Мутахассисларга кўра, бу технология об-ҳаво прогнозлари аниқлигини ошириш, хавфли гидрометеорологик ҳодисаларни эртароқ аниқлаш, шунингдек, авиация ва қишлоқ хўжалигини аниқроқ метеорологик маълумотлар билан таъминлаш имконини беради.
Марказий банк «Олтин Ой Кредит» номли сохта банкдан огоҳлантирди
Дайжестни Марказий банкнинг муҳим огоҳлантириши билан якунлаймиз. Марказий банк интернетда «Олтин Ой Кредит» номи билан сохта банк лицензияси тарқатилаётганидан огоҳлантирди.
Регулятор маълумотига кўра, Ўзбекистонда бундай номдаги акциядорлик-тижорат банки мавжуд эмас ва унга Марказий банк томонидан ҳеч қандай лицензия берилмаган.
Фуқароларга молиявий ташкилотларга оид маълумотларни Марказий банкнинг расмий манбалари орқали текшириш тавсия этилди.
